اليوم في تونس ما تسمع كان الكذب والبلادة والكذب هذايا موش كان من المواطن العادي إلي يحب يدبر راسو، لا بالعكس اليوم الكل يكذبو بداية من المسؤولين الكبار حتى لقناة تونس ضبعة، وبالمناسبة وكان باش اندخلو حديث في حديث هاك القناة إلي ما يتفرج فيها حد وكل مرة وين تجينا ورقة الضو يجي معاها معلوم الإذاعة والتلفزة بربي هكة موش العالم الكل يكذب على بعضو أحنا ما نتفرجو كان في الجزيرة خايف لمرة يكلمنا الشيخ متع قطر ويقول أدفعو ماكم تتفرجو في القناة متاعي.

نرجعو للكذب متاع المسؤولين وسامحوني كان طولت عليكم. هاك المرة نتفرج مع الوالد في برنامج عالتشغيل فز وزير قال تونس ما فيهاش بطالة وكل شاب يحب يخدم ينجم يندمج في المجتمع. الوزير حب يبلغ فكرة أنو الشباب سنك سنك (5/5) حد ما محتاج وبكلنا نسكنو في المنازه والمنارات ونركبو في التيس والتكسيات.

قام الوالد متغشش أنا في بالي اكتشف أنو الوزير يكذب ودار بيناتنا هالحوار حبيت ننقلهولكم كيما هو واحكموا وحدكم:

 الوالد: وليدي أشبيك ما تحبش تخدم
 آنا: ساكت
 الوالد: حاقرني يا ولد الكلب
 آنا: لا علاش بابا آش ثمة؟!! فين باش نخدم؟!!
 الوالد: ماكش تسمع في السيد الوزير!!!
 آنا: لا يا بابا راهو كذب في كذب
 الوالد: ياخي انت تعرف أكثر من الوزير قاري قداش من عام ومكلفو الرئيس باش يحل المشاكل تقول انت يكذب!!!
 آنا: (الحاصيلو بديت انسلك فيها وآنا خايف لا يقص عليا هاك الدينارين إلى يعطيهملي كل صباح) لا موش قصدي راهو الوزير هذا جديد ما في بالوش بينا أحنا جماعة المتريز ما انجمو نخدمو كان في التعليم وهو يحب يدبرلنا خدم في الشركات.
 الوالد: اخدم في الشركات حتى لين تجي الخدمة الرسمية.
 آنا: بالله أش باش نخدم آنا عندي متريز تاريخ يا خي في الشريكة باش انقري الموظفين عالحرب العالمية الثانية.
 الوالد: زيد اتلغبج وقول الدولة ما تحبش الشباب.
 آنا: باهي يا بابا هاني تو غدوة نمشي أنشوف الحكاية ونقدم مطلب وانشا الله يقبلوني.
 الوالد: هانو رقم التليفون مقيد متع البرنامج قيدو واحرص على روحك راهو عمرك مشا.
وآنا كيف العزوزا الى شدت سارق عرفت الي الرقم موش باش يرد وديما أوكيبي قيتو وقتلو.
 آنا: هاني باش نطلبهم تو من تليفوني.
 آنا نطلب وهو مشغول مشغول حتى وين كمل البرنامج
 آنا: شفت بابا الرقم مشغول وتوّ تسكر.
 الوالد: انت ديما مسكرها في وجهك يا ولدي احرك على روحك وشوف أمورك هو ولد حمد جارنا دخل يقري قالولي يعرف مسؤول مسو بحويجا ودبرلو خدمة شوف تلقاش انت حد يدخلك نعطوه حويجا وخليه يتوسطلك.
 آنا: يا بابا هذي اسمها رشوة
 الوالد: أش نعمل مالا نبقا انعاني فيك طول حياتي.
 آنا: لا تعانينا لا شي هاني باش اندبر كنترا في ايطاليا وماشي على روحي
 الوالد: برا المهم ترجع راجل
 آنا: باهي بابا ما تتغشش راهي البلاد الكل مسكرا وحدّ ما مرتاح.

الحاصيلو ورطني هاك الوزير بالكذب متعو زعمة رصاتلي بايت البرا لو كان موش شوية تكمبيص. الله يهديك يا وزير و يهدي كل الوزرا الكذابة كيفك.

نقلا عن مدونة الساخر: http://tounes2008.blogspot.com